Milli ástar og haturs

Sunneva hafði hlakkað til að fara í partí, hitta gömlu vinina og skemmta sér við að rifja upp háskólaárin. Endurfundir vinahópsins hljóta þó svipleg endalok þegar Sunneva fellur niður af svölum á efri hæð hússins. Lögreglan kallar réttarsálfræðinginn Kamillu Brim til aðstoðar við rannsókn málsins. Í ljós kemur að undir vináttunni krauma ólgandi ástríður, leyndarmál og svik sem eiga rætur langt aftur í tímann og hafa risið upp á yfirborðið. Datt Sunneva fram af svölunum? Lét hún sig falla? Eða var henni hrint?

Á sama tíma tekur Kamilla sín fyrstu skref í nýju sambandi með hrífandi lögmanninum Gísla. Hún les síðustu bréfin frá móður sinni og kemst að örlögum föður síns. Getur Kamilla fyrirgefið honum eða rista sárin of djúpt?

Milli ástar og haturs er þriðja bókin um réttarsálfræðinginn Kamillu Brim. Fyrri bækurnar, Rót alls ills og Uns dauðinn aðskilur okkur hafa hlotið gífurlega góðar viðtökur og notið fádæma vinsælda. Í sögunum um Kamillu hefur Hugrún Björnsdóttir skapað spennandi og rómantískan söguheim sem stendur saman af breyskum sögupersónum í samfélagi þar sem sannleikur og réttlæti þurfa oft að lúta lægra haldi.